O programa
Que é Competemar
O programa do Clúster Alimentario de Galicia (Clusaga) para que as empresas galegas do mar gañen competitividade e vendan en novos mercados.
Desenvólveo a área de Mercados e Internacionalización do clúster, nun convenio coa Consellería do Mar da Xunta de Galicia cofinanciado nun 70 % polo Fondo Europeo Marítimo, de Pesca e de Acuicultura (FEMPA).
Comezou en 2024 e vai pola terceira edición. Cada ano combina formación, información de mercados e accións comerciais en mercados escollidos tendo en conta as preferencias do sector.
Para quen
Empresas galegas do sector do mar —pesca, acuicultura, transformación, comercialización e servizos asociados—, con ou sen experiencia exportadora.
Está pensado para quen toma decisións na empresa: dirección, vendas, márketing e exportación.
Obxectivos
Potenciar e mellorar a competitividade para asegurar o crecemento sostible do sector dos produtos do mar.
01
Identificar novos mercados internacionais de oportunidade para o sector.
02
Dar ás empresas ferramentas para decidir novas estratexias de comercialización, aproveitar mellor os seus recursos e competir nos mercados obxectivo.
03
Apoiar con cheques a participación das pemes nas misións internacionais do programa.
Que ofrece
Do coñecemento do mercado á mesa do comprador.
Formación especializada
Curso de especialización en márketing e internacionalización: 75 horas de formación, 70 delas presenciais en Santiago de Compostela, e titorías individuais (5 horas por empresa) para deseñar e validar o plan internacional de cada empresa. Edición 2026.
Formación directiva
Programa de Dirección de Empresas Alimentarias, con San Telmo Business School: 48 directivos formados en 2025.
Información de mercados
Informes e webinars sobre cada mercado obxectivo: tendencias, canles de venda, requisitos de entrada e aranceis.
Misións comerciais
Axendas de reunións B2B con importadores e distribuidores, visitas a feiras e a puntos de venda.
Cheques de viaxe
Ata 2.000 € por empresa para participar nas misións.
Taste the Sea
Degustación e cociña en directo cos produtos galegos do mar diante de compradores internacionais. Londres 2026 e Dubai 2025.
Preguntas frecuentes
Se a túa dúbida non está aquí, escríbenos a info@clusaga.org.
Quen pode participar?
Empresas galegas do sector do mar: pesca, acuicultura, transformación, comercialización e servizos asociados. Non fai falta ter experiencia exportadora.
Como se entra?
Cada edición abre unha convocatoria cun formulario de inscrición. Hai selección: as empresas admitidas fan a formación e reciben información de mercados, e un grupo delas (dez nas edicións de 2024 e 2025) accede ao coaching individual, aos cheques de viaxe e ás misións.
Que se ten en conta para as misións?
O potencial de internacionalización da empresa, o seu encaixe no mercado de destino e o aproveitamento da formación.
Canto custa?
Na edición de 2025 a participación foi gratuíta para as empresas seleccionadas. O curso de 2026 ten unha matrícula de 1.200 €, que se pode bonificar ata o 100 %. Nas misións e eventos, a viaxe, o aloxamento e o envío de produto corren por conta de cada empresa; os cheques de viaxe, de ata 2.000 €, axudan a cubrilos.
Onde é a formación?
En Santiago de Compostela, de forma presencial. En 2026, unha xornada cada quince días, de 9:15 a 14:15.
Compartir esta páxina